Ye Daag Daag Ujala, Ye Shab Gazida Sahar
Wo Intezaar Tha Jis Ka, Ye Wo Sahar To Nahin

Ye Wo Sahar To Nahin Jis Ki Aarazu Lekar
Chale The Yaar Ki Mil Jaayegi Kahin Na Kahin
Falak Ke Dasht Main Taron Ki Aakhri Manzil
Kahin To Hoga Shab-E-Sust Mauj Kaa Saahil
Kahin To Ja Ke Rukega Safina-E-Gam-E-Dil
Jawaan Lahu Ki Pur-Asraar Shaharahon Se
Chale Jo Yaar To Daaman Pe Kitne Haath Pade
Dayaar-E-Husn Ki Be-Sabr Khwaab-Gaahon Se
Pukarti Rahin Baahen, Badan Bulaate Rahe
Bahut Aziz Thi Lekin Rukh-E-Sahar Ki Lagan
Bahut Qarin Tha Hasinaan-E-Nur Ka Daaman
Subuk Subuk Thi Tamanna, Dabi Dabi Thi Thakan

Suna Hai Ho Bhi Chuka Hai Firaq-E-Zulmat-E-Noor
Suna Hai Ho Bhi Chuka Hai Wisaal-E-Manzil-O-Gaam
Badal Chuka Hai Bahut Ahl-E-Dard Ka Dastur
Nishaat-E-Wasl Halaal-O-Azaab-E-Hijr-E-Haraam
Jigar Ki Aag, Nazar Ki Umang, Dil Ki Jalan
Kisi Pe Chaara-E-Hijraan Ka Kuch Asar Hi Nahin
Kahaan Se Aai Nigaar-E-Saba, Kidhar Ko Gai
Abhi Chiraag-E-Sar-E-Rah Ko Kuch Khabar Hi Nahin
Abhi Garaani-E-Shab Main Kami Nahin Aai
Najaat-E-Dida-O-Dil Ki Ghadi Nahin Aai
Chale Chalo Ki Wo Manzil Abhi Nahin Aai….,

Chale Chalo..